Contoh Naskah Drama Basa Sunda

Drama Sunda

OBOR PARAHYANGAN

Karya/Sutradara: Erwin Tejasomantri, S.Pd.

Salah sahiji televisi swasta kasohor, nyaeta Jawara TV, nyiarkeun rupa-rupa berita. Ieu beritana.

Adegan 1

Berita Banjir

Pembaca Berita 1 & 2

Assalamualaikum Warahmatullahi Wabarakatuh.

Pembaca Berita 1

Wilujeng siang pamiarsa, wilujeng patepang lawung paamprok jonghok dina bewara basa sunda Jawara TV, dinten ayeuna, tangtosna sareng simkuring Neneng Jamilah.

Pembaca Berita 2

Sareng simkuring Dewi Shinta. Simkuring parantos nyiapkeun bewara-bewara akurat jeung aktual pikeun urang sunda, sapertos perkawis banjir, demam berdarah, kriminal, olah-raga, sareng bewara pilkada. Kanggo bubuka, pamiarsa, ieu bewarana.

Pembaca Berita 1

Pamiarsa, hujan gede dibarengan angin ribut jeung dor-dar gelap nu teu euereun ngabalukarkeun banjir dimana-mana. Desa cimeong, kacamatan Rajasinga, kabupaten Indraprahasta nu biasana tara banjir, ayeunamah kabanjiran. Akibat banjir ieu rebuan warga Cimeong kapaksa ngungsi ka desa sejen nu sarua kabanjiran. Pamiarsa, urang sambungkeun wae sareng Reporter urang, saderek Kinanti Asmarandhana, di lokasi banjir Desa Cimeong.

Reporter 1

Pamiarsa, simkuring Kinanti Asmarandhana ayeuna nuju di Desa Cimeong, salah sahiji lokasi nu kabanjiran. Biasana mah desa ieu teh tara kabanjiran. Ceuk katerangan sababaraha warga, banjir ieu teh akibat rea tangkal nudituaran, pikeun dijieun suluh akibat harga BBM anu marahal. Akibat banjir ieu rebuan warga kaleungitan sawah, kebon, imah, harta banda sejena, jeung kapaksa ngarungsi ka desa tatangga nu sarua kabanjiran oge.

Warga 1

Banjir..., banjir..., banjir…, banjir… (Lulumpatan bari nakolan kohkol).

Warga 2

Hayu euy…, urang ngarungsi, ngungsi…, ngungsi…! (Ngungsi bari mawa gembolan nudibungkus ku sarung).

Warga 3

Burukeun atuh! Batur mah geus arindit, meni elat pisan. (Ngageroan pamajikanana bari mawa koper).

Warga 4

Ke heula atuh, tungguan! Koper we dibabawa, ari pamajikan ditinggalkeun, bari jeung eusina mah baju butut. (Nyusul salakina bari mawa guguling. Duanana silih tungtun)

Warga 5

(Ngungsi bari mawa hayam).

Warga 6

(Ngungsi bari mawa samak).

Reporter 1

Sakitu laporan simkuring, Kinanti Asmarandhana ti lokasi banjir desa Cimeong, hatur nuhun.

Adegan 2

Berita Demam Berdarah

Pembaca Berita 1

Hatur nuhun pamiarsa, masih dina Jawara TV, simkuring gagaduhan bewara demam berdarah. Pamiarsa, ieu bewarana.

Pembaca Berita 2

Wabah demam berdarah beuki nyebar kamana-mana. Rumah sakit, puskesmas, jeung klinik pengobatan ayeuna mah pinuh ku pasien demam berdarah. Rea pasien nu teu kasalametkeun akibat teu buru-buru dipariksa ka rumah sakit.

Pembaca Berita 1

Salah sahiji rumah sakit, nyaeta Rumah Sakit Harapan Sehat kabanjiran pasien demam berdarah. Ieu bewarana.

Reporter 2

Pamiarsa, simkuring Enok Camperenik nuju di Rumah Sakit Harapan Sehat. Salah sahiji pasien demam berdarah, nyaeta Ujang Astrajingga nuju dipariksa ku dokter Yudistira, dibantuan ku perawat, Juleha. Ujang geus opat poe ngaringkuk di rumah sakit alatan demam berdarah. Samemeh ka rumah sakit Ujang ngarasa demam, lalinu, murel, puyeng, jeung sajabana. Dina kulitna ngadadak kaluar bintik-bintik warna beuruem. Untungna, ku kulawargana Ujang buru-buru dibawa ka rumah sakit.

Pasien

Kumaha, dokter, kuring bakal salamet? Ieu awak nyareri pisan. Teu kuat, asa diseureud ku kamarang.

Dokter

Coba kaluarkeun letahna! Lumayan ayeuna mah, rada mendingan, teu siga kamari, parah pisan. Untung dibawa kadieu. Lamun henteu, moal katulungan. (Dokter mariksa letah pasien bari disenteran. Terus mariksa panon, ceuli, beuheung, jeung anggota badan ne sejenna).

Perawat

(Nyatet hasil pamariksaan dokter).

Reporter 2

Sakitu laporan simkuring, Enok Camperenik ti Rumah Sakit Harapan Sehat, hatur nuhun.

Adegan 3

Berita Kriminal

Pembaca Berita 1

Hatur nuhun pamiarsa, masih dina Jawara TV, simkuring gagaduhan bewara kriminal. Pamiarsa, ieu bewarana.

Pembaca Berita 2

Bandar narkoba kelas kakap, nu sering kaluar-asup penjara, nyaeta Mat Codet, dicerek ku polisi, tengah peuting poe kamari, di imah kontrakanana, Jl. Halimun No. 202 Astina. Ieu bewarana.

Reporter 3

Pamiarsa, simkuring Ai Zaitun ayeuna aya di Tempat Kejadian Perkara, Jl. Halimun No. 202 Astina. Mat Codet teh salah saurang gembong narkoba nu geus lila diincer ku aparat kepolisian. Mat Codet geus sering kaluar-asup penjara. Waktu rek ditewak ku polisi, Mat Codet nyobaan kabur jeung ngalawan, kapaksa salah saurang polisi nembak sukuna. Di tempat kejadian perkara, polisi manggihan ganja nu beuratna 5 kg.

Bandar Narkoba

(Lumpat, neang tempat panyumputan).

Polisi 1

Montong nyumput siah! Kapanggih ku kuring mah. (Ngundag bari ngacung-ngacung pestol).

Polisi 2

Awas! Lamun kabur ditembak ku kami. Nyerah maneh! Hiji…, dua…, tilu…! (Polisi 2 nembak bitis Mat Codet. Mat Codet nambru, teu bisa kabur deui, gagauran nahan kanyeuri. Pelor nepi kana tulangna).

Bandar Narkoba

Ampun pa polisi…, ampun…., kuring kapok, moal deu-deui… (Polisi 1 & 2 mawa Mat Codet ka kantor polisi).

Reporter 3

Sakitu laporan simkuring, Ai Zaitun ti tempat kejadian perkara, hatur nuhun.

Adegan 4

Iklan

Model Iklan 1

(Leumpang, meni percaya diri, panggih jeung awewe).

Model Iklan 2

(Neutup lalaki meni anteb, kasima, ngambeuan parfum nu dipake lalaki, terus utah).

Model Iklan 1

(Nyemprotan sakabeh awakna ku parfum, terus leuleumpangan deui).

Model Iklan 2

(Panggih deui jeung lalaki eta, terus bobogohan).

Model iklan 3

Aduh ieu sirah meni nyanyautan kieu, teu kuat…, teu kuat nyeri…! Tah, untung aya obat ieu, naon merekna nya? Euh…, Dagorin, obat neyeri sirah jeung nyeri huntu, mujarab, langsung cageur.  (Terus nginum obat Dagorin).

Adegan 5

Berita Olah Raga

Pembaca Berita 1

Hatur nuhun pamiarsa, masih dina Jawara TV, simkuring gagaduhan bewara olah raga. Pamiarsa, ieu bewarana.

Pembaca Berita 2

Pertandingan tinju internasional kelas bulu antara petinju nagara Amarta, Bima Puntadewa ngalawan petinju nagara Astina, Dursasana diayakeun di Sasana Maju Mundur nagara Amarta. Ieu bewarana.

Reporter 4

Pamiarsa, simkuring Ken Dedes ayeuna aya di Sasana Tinju Maju Mundur nagara Amarta, tempat pertandingan tinju internasional kelas bulu antara petinju nagara Amarta, Bima Puntadewa ngalawan petinju nagara Astina, Dursasana. Dua petinju ieu sarua jagona, sarua kuatna, sarua hebatna. Duanana pada-pada hayang jadi jawara dunya. Dina ronde katilu ieu dua petinju teh garelut akibat emosi nu teu katahan. Wasit, Sangkuni, teu bisa misahkeun duanana. Malahan katonjok ku petinju. Tungtungna wasit dibawa ka rumah sakit. Sakitu laporan simkuring, Ken Dedes ti Sasana Maju Mundur nagara Amarta, hatur nuhun.

Adegan 6

Berita Pilkada

Pembaca Berita 1

Hatur nuhun pamiarsa, masih dina Jawara TV, simkuring gagaduhan bewara pemilu legislatif. Pamiarsa, ieu bewarana.

Pembaca Berita 2

Pemilihan Umum Legislatif, ayeuna masih dina tahap kampanye. Salah saurang caleg, nyaeta Rahwana, ngayakeun kampanye di alun-alun kota Astina, nu dihadiran ku rebuan warga jeung simpatisan. Ieu beritana

Reporter 5

Pamiarsa, simkuring Citraresmi ayeuna aya di alun-alun kota Astina, tempat lumangsungnya Kampanye Pemilihan Umum Legislatif. Caleg Rahwana narik simpati rebuan warga dina kampanye ieu. Rahwana anu didukung ku Partai Kurang Dahar ngajangjikeun pendidikan gratis, rumah sakit gratis, jeung sagala rupa nu gratis.

Caleg

Para wargi sadayana, tong hilap, pilih simkuring, Rahwana, Coblos atawa contreng nomer sapuluh. Lamun kuring kapilih, Insya Alloh, pendidikan gratis, rumah sakit gratis, ojeg gratis, kawin gratis, bobogohan gratis, pokona mah sagala rupa gratis. Kade, omat, tong hilap, pilih simkuring, Rahwana, coblos atawa contreng nomer…sapuluh.

Warga 1, 2, 3, 4, 5 & 6

Hidup Rahwana! Hidup Rahwana! Hidup Rahwana! (Keprok).

Caleg

Tah…ieu mah minangka uang kadeudeuh ti kami. Tong hilap nya, pilih Rahwana (ngabagikeun amplop ka tiap warga, terus amplop diawurkeun, warga parebut amplop).

                               

Reporter 5

Sakitu laporan simkuring, Citraresmi ti alun-alun kota Astina, hatur nuhun.

Adegan 7

Panutup                                                                                                                                      

Pembaca Berita 1

Pamiarsa, sakitu bewara basa sunda anu kapihatur ti Jawara TV.

Pembaca Berita 2

Tepang deui enjing, dina program sareng jam anu sami ti Jawara TV. Wilujeng,

Pembaca 1 & 2

Assalamu’alaikum Warahmatullahi Wabarakatuh.

COPYRIGHT © 2009 ERWIN TJ

Telp. (0265) 790205 HP. 081322955900

www.erwintj.blogspot.com

www.erwintj.wordpress.com

E-mail: tejasomantri@yahoo.com